عبد الله جرجس بن أبي ياسر بن أبي المكارم بن أبي الطيب بن قردينة بن الطيب بن يوسف بن العميد ، مختصر اسمه جرجس بن العميد أو جرجيس بن العميد ، إتلقب بـ "الشيخ المكين " ( اتولد في القاهرة سنة 1202 - اتوفى سنة 1273 ). مؤرخ مصري مسيحي عاش في العصر المملوكي و عاصر السلاطين شجر الدر و عز الدين أيبك و الظاهر بيبرس. اشتغل كاتب ديوان الجيش المصرى، و قبل كده كان أخوه الأسعد إبراهيم بيشتغل كاتب الجيوش في عهد الملك الأيوبي العادل، و هو نفسه كان رجل دوله في العصر المملوكي و بالتالي كان مطلع كويس على أحداث تاريخيه مهمه في الفتره دي من تاريخ مصر. و معرفة ابن العميد بتاريخ المسيحيه و أحوالها في مصر، من جهه تانيه، إدته بعد إضافي ساعد بقية المؤرخين اللي جم بعده. من أهم كتبه "المجموع المبارك" و دا كتاب كبير أرخ فيه من بداية العالم لغاية عصره ( عهد الظاهر بيبرس ) أيام المماليك، واترجم في ليدن للاتيني حوالي سنة 1625، و " مختصر البيان في تحقيق الإيمان " و اسمه كمان " الحاوي ". كان ابن العميد ضليع في اللغه القبطيه و اللغه العربيه و له إهتمامات في علم الفلك. ذكر ابن العميد فى تأريخه إن لقب " البابا " ، معناه أبو الأباء ، استخدم لأول مره فى مصر لتمييز البطرك ، بعدين اللقب اتنقل من مصر لروما.
