الله يديم عليكم الاعياد
افرحي يادار الاجواد في الثامن عشر
من شهر ديسمبر العز ذكرى الانتصار
فرحته في كل عامٍ على مر الدهر
تبهج الخاطر وذكراه فرحه وافتخار
يوم فيه الشيخ جاسم بحيل الله قدر
يرفع البيرق بيمناه في وضح النهار
شيخ له في العدل مبدئ مثل مبدئ عمر
قالها في بيت شعرٍ وسارت له شعار
اسس الدوله على اساس عدلٍ مستمر
وصارت بعدله إلى اليوم في هذا المسار
واصبحت في ضل ابومشعل الوجه السفر
دولهٍ وصلت نجوم السماء علم وعمار
افخري يادوحه الخير آن إلك الفخر
والبسي ثوب التقدم وثوب الازدهار
درهٍ صاغك حمد غير عن كل الدرر
واصبح العالم يشوفك بدهشه وأنبهار
عاش من احيا تراثه بلمسات العصر
في زمن تراث الاجداد صابه لندثار
رجع الماضي بحاضر وسارت بالنظر
تحفهٍ باسلوب راقي وفكره وابتكار
والشوارع والدواوير تزهى بالزهر
روعة المنظر اتخليك تعجب كيف صار
والمرافق شي ماجا على خاطر بشر
كنها رسمه لفنان حاويها خضار
وزاد زين الدار شعب ٍ على الطيب اشتهر
تلتمس من طيبهم طيب عادك في المطار
جيت ضيف وكنت زاير وسارت لي مقر
طيب شعب وعظم قاده حذف كل اختيار
بيض الله وجه شعب ٍ بسيط ومقتدر
وبيض الله وجه الاجواد صناع القرار
قلتها وانا خليجي وعايش في قطر
شاعرٍ ماهو يكفيه فرحه وأعتذار
ومايوفى كل ماشوف بأبيات الشعر
من مشاعر صادقه قلت نبذه بأختصار
