الرئيسية > السؤال
السؤال
كيفية لعب البلوت
السلام عليكم منزمان و انا ابي اتعلم بلوت دخلت كل المواقع لا فهمت وحتى اخوياي حاولو يفهموني ما قدروا ف يليت احد يشرحلي شرح مبسط :)

مشكرورين
ورق اللعب | ألعاب الإنترنت | الكمبيوتر والإنترنت 1‏/8‏/2013 تم النشر بواسطة بدون اسم.
الإجابات
1 من 2
ههههههههههه

لازم و انا معك ,,,, و الورق في يدي

و انا انصحك تعلم الصن اول ... اخوياك قلهم لا يلعبون معك حكم قلهم صن فقط
6‏/8‏/2013 تم النشر بواسطة أيمن المالكي.
2 من 2
تتكون اللعبة من مزادين ( الحكم ) و ( الصن )

والمزاد الاقوى دائماً هو الصن



نبدأ اولاً بشرح الحكم :

ترتيب الحكم هو

الولد = عشرين بالعد << يعني اذا خلصت الطقة وعقبن جلسنا نعد الولد يسوى عشرين
التسعة = اربعة عشر بالعد
الإكه = إحدى عشر بالعد
العشرة = عشر بالعد
الشايب = أربعة نقاط
البنت = ثلاث نقاط
الثمانية = صفر
السبعة = صفر



ترتيب الصن :


الإكه = إحدى عشر بالعد
العشرة = عشرة بالعد
الشايب = اربعة بالعد
البنت = ثلاث بالعد
الولد = اثنين بالعد
التسعة = صفر
الثمانية = صفر
السبعة = صفر



مشاريع اللعب :


الاقوى دائماً ( اللي ماعمره جاني الا كم مره )
أربعمية = أربع إكك
ميه = أربع صور متشابهة أو خمس أوراق متسلسة
خمسين = أربع اوراق متسلسة
سرا = ثلاث أوراق متسلسة
بلوت = البنت والشايب من نوع الحكم الذي حكم عليه << يعني هالمشروع مايكون الا بالحكم بس



طريقة اللعب :


يتم اللعب عن طريق أربع لاعبين بشكل زائد ( + ) كل لاعب امامه لاعب ( يعني قدامه خويه )



طريقة توزيع الورق :


( معليش ابتكلم بالعامي قسمن بالله تنح راسي ) biggrin
اول شي ياخذ الموزع الورق ويخبصها ويخبصها ويخبصها .. وعقبن يقول للي على يساره قص << يعني خذ ورقة واكشفها ونزلها بالارض ( طبعاً اذا ماوده يقص لايقص )
وبعدين يقوم الموزع يبدا توزيع من اليمين
يعني يعطي اللي على يمينه ثلاث .. وبعدين يعطي اللي بعده ثلاث ... وبعدين يعطي اللي بعده ثلاث ... وبعدين يعطي نفسه ثلاث
وبعدين يعطي اللي على يمينه ثنتين .... وبعدين يعطي اللي بعده ثنتين ... وبعدين يعطي اللي بعده ثنتين ... وبعدين يعطي اللي بعده ثنتين
المهم بعد مايخلص توزيع الورق راح يكون مع كل واحد خمس اوراق ... وراح تكون فيه ورقة بالارض ... واذا كان خوينا اللي على يسار الموزع ماقص يقوم الموزع وينزل ورقة على الارض
وخلونا نفترض ان الورقة اللي بالارض هي ( بنت هاص )
الحين الموزع يقول ( أول ) يعني من وده يحكم هاص ( لان الورقة اللي بالارض هاص ) او من يبيها صن
اذا قالوا كلهم بس ... يقول الموزع ثاني .. يعني من يبيها حكم ثاني غير الهاص
لنفرض ان الموزع يوم قال أول قال اللي على يمينه حكم ... وكان ورق خوي الموزع ( اللي هو جالس قدامه عنده قوة صن ) طبعاً اكيد بيقول صن << لان مثل ماقلت لكم الصن دايماً اقوى من الحكم
يقوم الموزع ويعطيه الورقة اللي بالارض .. وبعدين يكمل التوزيع ويعطي اللي على يمينه ثلاث أوراق .. وعقبن يعطي اللي بعده اللي هو خويه اللي جالس قدامه ثنتين ( لانه اخذ ورقة الارض ) وعقبن يعطي اللي بعده ثلاث وعقبن يعطي نفسه ثلاث
وعقبن يلعبوووون



طريقة الشراء او المزايده :



الحين اللي مايعرف البلوت يقول طيب شلون اشتري حكم ولا صن ؟؟
طيب مثل ماقلنا لنفرض ان الورقة اللي كانت بالارض ( بنت هاص )
وحنا قلنا اللي على يمين الموزع قال حكم << يعني ابيها حكم هاص
طيب ليه قال أبيها حكم ؟؟
يعني لنفرض ان الاوراق اللي كانت معه هي ولد الهاص .. وشايب الهاص .. وسبعة هاص .. وسبعة ديمن .. وبنت الشيريه
هو ماقال كذا عبث .. لا لانه ورقة لحكم الهاص قوي .. يعني لو حكم واخذ البنت راح يكون معه ولد الهاص وشايب الهاص وبنت الهاص وسبعة هاص << كل هالاوراق من الحكم
يعني شايب هاص + بنت هاص << الحين هو كسب مشروع البلوت
يعني ورقه لحكم الهاص قوي يقدر ياكل فيه اكل كثير
طيب بس حنا قلنا ان هذاك الثاني اللي هو خوي الموزع قال صن
طيب ليه هو قال صن ؟؟
يعني تخيلوا انه معه إكه سبيت وعشرة سبيت وعشرة هاص وبنت الديمن واكة ديمن
هو كذا ورقه قوي للصن ... ويمكن تزيد قوته بعد مايكمل الموزع توزيع << يعني لاتحط آمالك دائماً على الورق اللي معك من التوزيعة الاولى .. ترا يمكن يجيك خير اذا كملوا توزيع




طريقة لعب الحكم :



لنفرض ان اللعب راح على حكم ... واللي حكم هو اللي على يمين الموزع
طبعاً انا علمتكم وش ترتيب الحكم ووش ترتيب الصن
اللعب بالحكم يكون حكم + صن مع بعض
يعني نلعب حكم اذا كانت اول ورقة نزلت بالارض من الحكم ... وينقلب اللعب لصن اذا صارت اول ورقة نزلت من نوع غير الحكم
يعني اذا كان الحكم هاص ونزلت اول ورقة ولد .. لازم اللي بعده ينزل حكم ... واذا مامعه يلعب أي ورقة من نوع او زات ثاني << طبعاً يلعب مصلووحه
وحنا قلنا ان الولد هو أكبر شي بالحكم
لكن اذا نزلت اول ورقة هي شايب الهاص ... واللي عنده الدور معه اكه هاص << هو الحين لازم يلعب الاكه
لان اللعب الحين طلوع ... يعني اذا معك قطعة اكبر من قطعة الحكم اللي معك لازم تطلع فوقها بورقة اكبر منها
واذا مامعك اكبر منها العب اللي اصغر منها
لكن اذا اول ورقة نزلت هي شايب هاص ... واللي بعده ماكان معه اكبر من الشايب ولعب شي صغير ... وجا الحين دور خوي اللي لعب الشايب << هو الحين موب مجبور انه يطلع فوقه بالورق
لانه هذاك مامعه اكبر من الشايب وخوي اللي لعب الشايب موب مجبور انه يطلع << وهو مخير وده يطلع فوقه ولا لا بالورق
لكن لنفرض ان اول ورقة نزلت من نوع غير الحكم ... وكان احد اللاعبين مامعه من النوع او الزات اللي انلعب ... لكن معه من نوع الحكم ... هو الحين مجبور انه يقطع بالحكم لانه مامعه من نوع الزات << وطبعاً الاكله راح تكون له لانه قاطع
لكن اذا قطعوا باللعب اثنين .. والقطع لازم يكون طلوع بالاكبر << اللي ياخذ الاكله هو اللي قطع بالكبير
يعني اعطيكم اللعبة بطريقة مبسطة ... اللي يلعب اكبر شي هو اللي ياكل ... لكن موب معنى ان اللعب صن والورقة اللي نزلت بنت وانا معي عشرة يعني ماقوم واتهور وانزل العشرة << لانه يمكن اللي بعدي معه إكه وياخذ عشرتي
عشان كذا اللعبة يبيلها مخ وتفكير ( وفرنكة )



نموذج للفنركة باللعب :



لنفرض ان اللعب صن .. والدور عندي باللعب
وانا كان معي اكة هاص وشايب هاص وبنت سبيت وسبعة ديمن وسبعة شيريه
انا الحين ابتفرنك وابلعب الشايب << طيب يابق بق انت معك الاكه تقدر تاكل فيها :biggrin23:
بس انا ابقول لا ابلعب الشايب لان تفكيري إني اخذ العشرة ... يعني يمكن انا اذا لعبت اكه الهاص واللي بعدي معه ثمانية هاص وعشرة هاص .. يعني اللي بعدي موب غبي عشان ينزل العشرة ويكبر لي
لا اكيد بينزل ثمانية الهاص :biggrin23:
لكن لو انا لعب اول شي شايب انا كذا أبتوهه وابضيعه .. يعني بيحسب ان الاكه موب معي وانها مع غيري وبكذا بيلعب صغير وعقبن اباكل انا ... وبعدين اللعب الاكه واخذ عشرته
نصيحة بلووتيه ( لاتتفرنك بالحكم ابد :biggrin23: ) واذا لعبتوا بلووت بتفهموون ليه انا قلت تسذا





والحين مابقى الا اقول طريقة تنزيل المشاريع :




لو كان معك مشروع ميه او خمسين او سرا او غيرها ... بالدورة الاولى باللعب ... او عشان اكون اوضح اذا جيت تنزل اول ورقة تلعبها تقول المشروع
وعقبن اذا جيت تنزل الورقة الثانيه تعرض المشروع لهم
واذا كان مشروعك فيه غلط << سجلوها عليكم واخذو النقاط كلها
اما مشروع البلوت اللي مايكون الا بالحكم فطريقة عرضه تكون :
انت معك بنت وشايب من نوع الحكم ... ولنفرض ان اول ورقة نزلتها بنت ... اذا جيت تنزل الشايب تقول بلوت << او العكس اذا نزلت الشايب اول وجيت تنزل البنت بعدين تقول بلوت


المهم اذا خلصت الطقة نقوم بحساب النقاط
ولنفرض ان نقاط اللي ماشروا اللعب اكثر من نقاط اللي شارين
هنا ياخذون نقاطهم كلهم
طريقة حساب نقاط صن :
بكل عشرة ( نقطتين ) وعليكم الحساب
طريقة حساب الحكم
بكل عشرة ( نقطة وحدة ) وعليكم الحساب



المشاريع بالصن :

مشروع الاربعميه = 40 نقطة
الميه = 20 نقطة
الخمسين = 10 نقاط
السرا = اربع نقاط


مشاريع الحكم :


ااربع اكك = ميه بالحكم
يعني اذا قلت ميه بالحكم = عشر نقاط
الخمسين = خمس نقاط
السرا = نقطتين
البلوت = نقطتين








وأي استفسار بلوتي انا جاهز لكم
21‏/10‏/2013 تم النشر بواسطة nicollo.
قد يهمك أيضًا
يا جماعة فيه أحد لعب Assassins's creed ؟؟
هل يمكن لعب البلياردو بعصاية اليبسبول .. ؟؟؟ <<< O_o
من أول من لعب كرة القدم؟؟؟
من أول من لعب الشطرنج؟
ماهو حكم لعب الشطرنج؟
تسجيل الدخول
عرض إجابات Google في:: Mobile | كلاسيكي
©2014 Google - سياسة الخصوصية - مساعدة