الرئيسية > السؤال
السؤال
كيف يصنع الشمع الخام
المنزل | الكيمياء 26‏/11‏/2010 تم النشر بواسطة AYMANAPDO.
الإجابات
1 من 1
صناعة الشموع من الالف الى الياء


السلام عليكم يا اخواتى يا فتوكات يا حلوين
النهارده ان شاء الله هقدملهم ازاى نصنع شموع زينة بنفسنا ودى طبعا حاجة جميلة اوى وبتملى الفراغ وثمنها فى ايدينا وكمان لو كمشوع هتبقى كويسة جدا لانك ممكن تبتديها باى راس مال والسوق المصرى فعلا محتاجها .
- وكنت عايزة اوضح انا مبتدئة فى صناعة الشموع صنعت كم حاجة صغيرة كده بس لسا بحاول اظبط المنتج عشان يطلع كويس
وكنت عايزة اوضح لكوا اسعار الشمع الخام الشمع العادى اللى هو اسمه شمع البرافين واحسن الانواع النوع المصرى لانه بيستحمل درجة حرارة عاااااااالية اوى بالنسبة للجو الحر اللى عندنا فى الصيف بعكس انواع الشمع التانية زى الصينى مثلا والمجرى والفرنسى ودى الانواع اللى بنستوردها من بره بس للاسف بتبقى شكل الشمعة زى الفل طول الشتاء ولمجرد يجى عليها الصيف بتسيح من الحر وتلاقى شكلها بيتنى كده لوحده انما الشمع المصرى ما شاء الله جميييييييييييل لانه مستخرج من ارضنا احنا فمناسب للجو عندنا ولا بياثر فيه مشاكل الجو وماتنسوش ان الشمع ده من مشتقات البترول يعنى بيخرج من الارض فعشان كده كل ارض على حسب جوها بقى انتوا فاهمنى والشمع المصرى اسمه شمع العامرية وده هتنزلوا تشتروه من الغورية فى محل بيبيعه الكيلو ب7 ومحل الكيلو ب8 يعنى اسعار رخيصة وحلوة وفى نوع تانى اسمه شمع السويس هو كويس برضه بس ده بصراحه انا مش اتعاملت معاه بس اكيد اسعاره فى المتناول يعنى انما بالنسبة بقى لشمع الجيل ده يا جماعة بيكون غاااااااااااااااالى اوى يعنى انا لما سالت فى الغورية ودول طبعا يا جماعة تجار الجملة بتوع الشمع يعنى ارخص اسعار موجودة قالى من 50 او 70 جنيه الكيلو وانتى طالعة وفى ناس بتبيعه ب80 لان الجيل شمع مصنع مش مستخرج من الارض زى البرافين هو شكله جميييييييييييييل جدا بس للاسف ده لو عشان مشروع عمره ما ينفع يحقق مكاسب لان الصين بتنزلوا فى منتجاتهم وبسعر رخيص احنا مش عارفين ننافسه لان سعر الجملة اصلا غالى وانا هحاول يا جماعة بقدر الامكان اقولكم على كل حاجة اعرفها ولوفى اى حاجةمش واضحة اسالوا وانا تحت امركم ان شاء الله. نبدء بإسم الله:::

*أنواع الشمع الخام:-
المصرى(العامرية) ودرجة انصهاره 78 مئوية.
الفرنسى ودرجة انصهاره 75.
الصينى درجة انصهاره 68.
المجرى درجة انصهاره 64.
الجيل درجة انصهاره 55.
*المكونات:-
-شمع البرافين 90% -حمض استيارك 5% -مصلب5% دول الاساس للشمع .
-فى بقى تيتانيوم (نص معلقة صغيرة للكيلو) ده عشان نخلى اللون مركز شوية.
لو هنعمل الشمع فى زجاج يبقى شمع ومصلب بس ولو حابة تحطى تيحطى تيتانيوم يبقى بسيط جداااااااااااااااااا.
-زيت البرافين لدهن القوالب قبل صب الشمع فيها والزيت ده احسن من الفازلين لان الفازلين بعد كده بيلم تراب من الجو انما البرافين بيعطى للشمعة نعومة ولمعة خفيفة كده بيخلى شكلها لطيف.
-االوان الشمع: بنجيب الوان مخصصة للشمع وبتكون بودرة مش سايلة ابداااااا لان السايلة مش مخصصة للشمع خالص ولا تنفعله وبتوبظ درجة اللون النهائى للشمعة وناخد فى اعتبارنا ان البوردة نستخدمها بحرص شدييييييييييد جداااااااااااااااا لانها تقيلة اوى اوى يعنى مش بنتعامل معاها بالمعلقة لاء بنتعامل براس الكبريت، وبنجيب ال3 الوان الاساسية (احمر -اصفر- ازرق) وعشان نحصل على جميع الالوان:-
احمر+ازرق=بنفسجى
اصفر+ازرق=اخضر
اصفر+احمر=برتقالى
اصفر+احمر+ازرق=بنى
احمر خفيف اووووووى =بمبى (روز)
الشمع الخام بيكون لونه مصفر شوية فلة عايزين نعمل الون الابيض= شمع+10%ستيارك+نص معلقة تيتانيوم للكيلو ومفيش مصلب خاااااالص عشان بيصفر اللون.
- العطر: هو من الممكن نستخدم اى انواع عطور بس فى عطر مخصص للشمع وده بيتباع بالكيلو فى وسط البلد.
- الفتيل: فى منه احجام فى رفيع وفى تخين بس للشموع الزجاجية او الشموع اللى معمولة فى حاويات زى مثلا صينى او زجاج او اى شمعة معمولة فى جوه شىء معين مش هنخرجها منه تانى يبقى لازم نستخدم الفتيل التخين. ( لازم لازم لازم الفتيل يكون مصنوع من قطن صااااااااااافى مفيش اى الياف صناعية خالص).
* القوالب:-
قالب معدنى: مميزاته انه بيبرد الشمع بسهولة جداااااااااا انما بقى عيوبه انه غالى اوى ولازم يعمل شمعة تكون سطها مستوى يعنى شمعة مربعة شمعة مسطيلة او على شكل هرم كده يعنى انما مثلا مش تنفع نعمل فيها قلوب او ورد اواى شكل فيه تفاصيل خالصوكمان بتخرج منها الشمعة بصعوبة جدا.
القوالب البلاستيك:ودى منزلية نوعا ما يعنى اى حاجة بلاستيك فى البيت بس لازم تكون بتتحمل درجة حرارة عالية مش من البلاستيك اللى بيسيح بسهولة ودى بقى نعرفها ازاى اذا كان بيسيح ولا لاء نجيب الشىء البلاستيك اللى عايزين نستخدمه كقالب للشمع ونصب فيه ماء مغلى الاول لو ساح يبقى طبعا لايصلح للشمع لو استحمل الماء المغلى يبقى ينفع استخدامه طبعا، بس عيوبها انه ماينفعش اكرره كتيييييييييييير يعنى مثلا اعمل دستة او دستين شمع منه لانه بيكون حاجة كده وقعت فى ايديك بالصدفة ومش ينفع للمشاريع وعمل كميات.
قوالب السليكون: مميزاتها انك بتعمليها فى البيت ازاى بقى انك بتجيبى اى شكل عاجبك نقول مثلا الفواكة اللى فيها مغناطيس اللى بنلزقها على باب الثلاجة دى وبتثبتيها على اى حتة كرتون بلبانه مثلا او حتة صلصال وبعدين تدهنيها بالفرشة بالصابون السايل بتاع الاطباق ده يعنى كمادة عازلة وبعدين نغطيها بطبقى من معجون السليكون وده بيجى من عند الموان ونسيبها تنشف يمكن مثلا من باليل للصبح لحد ما تنشف خالص وبنعزل بالصابون تانى بعدين بنحط طبقة كمان ونسيبها تنشف برضه عايزة تحطى طبقة تالتة اوكى مش عايزة مش مهم وبعد ما تنشف بتستخدميها بقى كقالب شمع يعنى بتدهنيه من جوه بزيت البرافين وتصبى فيها الشمع وتسيبيه لحد ما ينشف هتخرجلك الشمعة جميلة اوى على حسب شكل الشىء اللى انتى شكلتي عليه المعجون من الاول وكل ده طبعا كان من مميزاتها انها بتتعمل فى البيت، بس عيوبها بقى انها عمرها قصير لانها بتتاثر بالحرارة فمع الوقت بتلاقيها ساحت كده وشكلها باظ يعنى بعد مرتين كده مثلا .
قوالب المطاط: دى بقى زى القوالب السليكون انما مش بتتصنع فى البيت دى فى ناس مخصصة بيصنعوها بس فيها نفس مميزات قوالب السليكون بتستخدم لاى شكل فيه تفاصيل وبتخرج منها الشمعة بسهولة جدا ومش بتحتاج للتشطيب كتير ودى اللى انا شخصيا بستخدمها لسهولة التعامل معها ولجمال اشكالها من الشمع النهائى ولانها متاحة اكثر حاجة وعمرها طويل ومش بتتاثر بالحرارة وثمنها فى متناول الايدى وده النوع المناسب اللى يستخدمه اللى عايز يعمل الشمع كمشروع عيبها الوحيد انها مش بتبرد الشمع بسهولة.
* درجات الحرارة لصب الشمع :-
البرافين فى الزجاج عند 120 مئوية مش يزيد عن كده
البرافين فى القوالب 170 وتحاولوا لا يزيد عشان مش يطلع خشن ولا يقل عشان مش يعمل شكل فقاعات هوا فى الشمعة
شمع التشطيب (ال finish) بيكون عند 70 مئوية، التشطيب ده بقى بيكون ازاى؟؟؟ الاول نضيف 10 جرام ستيارك للكيلو عشان بيدى لمعة ونعومة للشمعة وبيضعف الاحتراق يعنى مش تخلص بسرعة وهو ده الهدف اصلا من اضافة الاستيارك(نمسك الشمعة من الفتلة بتاعتها ونغطسها فى الشمع المنصهر اللى من نفس لونها ونطلعها واحدة واحدة بالراحة ببطىء لانه بيعمل عليها طبقة ناعمة حلوة كده ولو عايزة تغييرى اللون يعنى تعملى طبقات من الوان مختلفة يعنى اللى فوق احمر واللى تحته اصفر وهكذا برضه بنفس الطريقة بس عادةً نكون عاملين حسابنا واحنا بنسيح لشمع الاساسى ان يكون فى شمع متبقة عشان التشطيب بيكون ليه التشطيب ده عشان لو طلعلك فى الشمعة اى فجوات او خروم صغيرة اوى اوى كده او فيها اى حاجة مش مزبوطة مش ترجعى تسيحيها تانى من الاول خالص لاء يعنى من الاخركده التشطيب=المعالجة.
وشمع الجيل بيتصب عند درجة حرارة 90 مئوية عشان يكون ناعم بس لو عايزين فيه فقاعات يبقى عن 60 مئوية وطبعا انا اتعلم عن الجيل وقلت عيوبه فين مع اضافة ان الجيل لاااااااااااااااااااااازم يتعمل فى حاويات يعنى زجاج او صينى او اى حاجة شفافة او غير شفافة انما ماينفعش خااااااااااااااااااااالص يتعامل معاملة البرافين ويتحط فى قوالب لحد ما ينشف وبعدين نخرجه لانه هو فى قوامه زى الجيلى فعلا طرى اوى ومش ماسك نفسه فلازم يتحط فى حاويات عشان تمسكه.

*تزيين الشمعة:-
- الوان الدهان العادية بتاعت الجدران زى اسكيب وغيرها مش الوان الماية (هى كويسة انما هتبقى غالية على ثمن الشمعة)اللى هى شبه ازازه دوا الكحة كده وفى منها كل الالوان وهى والفرش بتيجى من عند الموان .(ودى عشان الرسم على الشمعة مثلا لو عملتى شكل دبدوب صغير مثلا فبطلع مثلا لونه بنىاللى هو اللون الكامل للشمعة فبتكونى محتاجة انك تلونى عنيه او رجليه بلون مختلف عشان شكله يبقى حلو .
-ولو عايزين نلزق برونز على الشمعة : نص غطا ورنيش مائى على 5 نقط ماء مع البرونز ونقلبه وندهنه بالفرشة
- ولو عشان نلمع الشمعة بس يبقى نص غطا الورنيش المائى على 5 نقط ماء بس من غير برونز. وبرضه الورنيش المائى ده من عند الموان .

*ملاحظات:-
الوعاء اللى هنسيح فيه لازم لازم يبقى الومنيوم ، تيفال لاء استانلس لاء صاج لاء الومنيوم بس
وتسييح الشمع ده بيكون عن طريق عمل حمام ماء ساخن ليه ودى الطريقة اللى موجودة فى كل المنتديات وبعض الكتب كمان بس مشكلتها بتاخد وقت كبير وبيزهق انا شخصيا كنت بعملها الاول انما حاليا بحطه على النار مباشرة بس نار هادية واكون واعية ليه اوى واول ما يوصل لدرجة الحرارة اللى انا عايزاها بشيله على طول مش ينفع تسيبيه يوصل لدرجة عالية لانه ممكن يدخن ويضايقك طبعا يعنى اول ما يوصل لدرجة الحرارة اللى عايزاها تشيليه من عالنار علطول وبتعرفى درجة الحرارة منين؟؟ بتكونى مراقباه بالترمومتر وده بيجى من محلات فى وسط البلد بيبقى ترمومتر لقياس درجات الحرارة العالية لحد 240 يعنى مش الترمومتر بتاعتنا لما بتعب ده لاء ترمومتر مخصص لكده وبيبقى ثمنه حوالى 8 جنيه كده وبنقيس ازاى؟؟ بتحطى الترمومتر قريب من سائل الشمع يعنى مش تغطسيه لالالالالا بيبقى من فوق خالص على الوش وبيبقى فيه خط كده رفيع اوى اوى اوى لونه فضى عمال يطلع وينزل على حسب درجة الحرارة فاول ما يوصل لدرجة الحرارة اللى انتى عايزاها يبقى خلاص كده تصب على طول وطبعا اول حاجة بنعملها بتجيبى الوعاء وتحطى فيه الشمع على حسب الكمية اللى انتى عايزاها بحيث انه كمية الشمع تكون 90% وحمض الاستيارك 5% والمصلب5% يبقى كده ال100% وبعدين تحطيه على النار بقى ولما يدوب يتضيفى الوان وقلنا بحرص شديد اوى عشان الوان البودرة تقيلة اوى وخلاص قبل ما تصبى علطول تضيفى العطر حوالى 4 نقط كده قبل الصب مباشرة حرصا عليه من التبخر ، والقوالب طبعا لازم تدهن بزيت البرافين بفرشه مخصصة لكده وبتكون مخرومة ومتثبت فيها الفتيل كويس ولو هتستخدمى القوالب المطاط مش تقلقى لانها مشبتعمل اى تسرب للشمع وبتخرج بسهولة بعد ما يجف .

*حساب الشمعة (للمشاريع لتحديد التكلفة وبالتالى تحديد الربح):-

مثال : - لو وزن الشمعة 100جرام = 90جرام شمع+5جررام ستيارم +5 جرام مصلب
الكيلو = 1000 جرام وسعر كيلو الشمع 7 جنيه والجنيه 100 قرش
يبقى الـ90 جرام شمع= 90جرام*700قرش/1000جرام=63 قرش

-5 جرام استيارك
سعر الكيلو(1000جرام) =15 جنيه والجنيه 100 قرش
5جرام * 1500 قرش /1000 جرام=7.5 قرش

-5 جرام مصلب
سعر الكيلو(1000جرام)=12 جنيه والجنيه 100 قرش
5جرام*1200قرش /1000جرام =6 قرش

المجموع= 77 قرش تقريبا

(الوان الشمع - العطر - فتيل) =25 قرش
77+25 =102 قرش يعنى تقريبا 1 جنيه

اذن الشمعة اللى وزنها 100 جرام ثمن تكلفتها 1 جنيه.

********* بصوا بقى يا جماعة الشمع بيجى من الغورية روحوا عند باب زويلة تحت باب زويلة بالضبط فى محلين واحد كبير اسمه جابر الشماع و محل تانى صغير كده بس مش مكتوب عليه اسم وده ارخص من جابر بجنيه واحد ودول عندهم الشمع والاستيارك والمصلب.
انما بقى بالنسبة لباقى المستلزمات هحاول اجيبلكم الاماكن بالظبط وكل حاجة بتيجى منين اما الحاجات اللى من عند الموان فاعتقد ان الاسعار واحدة او لو هتفرق على حاجات بسيطة او يعنى وعلى فكرة الاسعار اللى انا كتبتها فى حساب الشمع دى اخر اسعار انا اشتريت بيها ويااااااااااااااااااااااااااااااااااااااارب الموضوع يعجبكم ولو حد فعلا نوى يصنع ومحتاج اى حاجة يقولى ولو حد عنده خبرة او يعرف حاجة جديدة يدخل ويشارك معانا ونا تحت امركم فى كل اللى انتوا عايزينه.
وربنا يرزقنا ويرزقكم الرزق الحلال الطيب ان شاء الله
26‏/11‏/2010 تم النشر بواسطة حسن الجناينى (الا ان سلعه الله غاليه).
قد يهمك أيضًا
اريد نبذة عن الشمع ...البارافين..؟الشمع الموجود في الزيت الخام في النفط؟ ضرورررري ؟ وشكرا وجزاكم الله خيرا؟؟
كيف تصنع الشموع ؟
طريقة استخدام الشموع لديكور البيت
كيف تتم صناعة الشموع .!
تسجيل الدخول
عرض إجابات Google في:: Mobile | كلاسيكي
©2014 Google - سياسة الخصوصية - مساعدة