الرئيسية > السؤال
السؤال
اريد ان اخبركم عن تجربتي مع ضمان آي كير iCARE التابعة لشركة شاس تك
‎السلام عليكم
‎حبيت اطرح تجربتي مع آي كير التابعة لشاس تك وارجو انها تكون مفيدة للغير حتى يعرفوا مع من يتعاملون
‎عندي آيبود تاتش ضمان آي كير ومشترينه من Best
‎الجهاز تعطل فجأة وصار ما يشتغل ولا يستجيب للشحن، اخذته لبيست قالوا خذه لآي كير iCARE لأن الضمان عنده..
‎رحت آي كير في شرق طريق العروبة واول ما دخلت سمعت صوت واحد يصارخ

‎وشوي ويتلاقط مع الموظف ويطلب مقابلة المسؤول.. شوي طلع له واحد ووعده انه يستلم جهازه بعد ربع ساعة..
‎اللي فهمته من كلامه ان له جهاز صار له ثلاث ايام علشان يركبون له لوحة مفاتيح عربي وما خلصوه..

‎المهم جلست انتظر دوري لان كان قدامي وحده واقفه ما لقت لها كرسي تجلس عليه وما تبي تجلس مع الرجال وما احد من الموظفين قام يجيب لها كرسي من هنا ولا من هنا..
‎المهم طلبت رقم قالوا ما فيه ارقام قلت طيب وشلون تعرفون السرا..قالوا اجلس وحنا نناديك..

‎المحل باين عليه مضغوط بالشغل وما فيه الا ثنين يستقبلون الزباين..المهم جا دوري وفجأه قمز ذاك الواحد وسبقني وجلس قبلي مع انه شايفني جاي قبله
‎رحت للموظف وقلت يا ابوالشباب انتم عندكم ترتيب ولا من سبق لبق..الرجال فهمها وقام وخلاني اجلس. ودار هالحوار بيني وبين الموظف:

‎الموظف: تفضل وش عندك يالحبيب؟
‎انا: شكل عندكم ضغط

‎هو: ايه والله مضغوطين، فوق زباينا شركة الاتصالات تحول علينا من جميع انحاء المملكة نقدم لهم صيانة على السوفت وير..تفضل وش مشكلة جهازك؟

‎انا: قلت له السالفة بكل ثقة

‎اخذ الموظف الجهاز وقلبه يمين ويسار يدور كسر ضربه مخش اي شيء وفي الاخير..

‎هو: الجهاز مكسور..شف الشاحن المسمار الاخير معفوط!!!!

‎انا: ابحلق في مدخل الشاحن وما اشوف مسامير!!! عرفت ان رفيقي ما عنده سالفة ويبي يتهرب من الضمان..

‎انا:الجهاز سليم وما فيه الا العافية والضمان باقي فيه ٤ شهور

‎هو: طيب لحظة اوديه للمهندس.. ودخل وجلست انتظر خمس دقايق تقريبا بعدها طلع لي وقال الجهاز داخله سوايل!!! الضمان ما يغطيه

‎انا: طيب يالحبيب والحل؟!؟

‎ هو:  الحل نغير لك البورد وتراها بقيمة جهاز جديد..ولا اذا تحب ادلك على محل يصلحهن


‎طلعت من عندهم وتوجهت لحاسبات العرب اللي بعد بنك الجزيرة على ش العليا العام شمال، لاني سمعت انهم بائع معتمد من ابل، وكانت المفاجأة بالنسبة لي ..

‎انا: السلام عليكم عندي هالجهاز سكت ما ادري وش فيه.
‎هو: اخذ الجهاز وحطه قدامي تحت لمبه قوية وقام يبحلق فيه..وبعدين ناظرني وقال الجهاز سبق دخل فيه سوائل؟
‎انا: والله يالحبيب ما اذكر ابداً انه دخله سوائل لكن كل شيء جايز يمكن واحد من العيال سواها..
‎هو: طيب ما دام انك متأكد رايح اغير لك الجهاز..ولا يهمك

‎انا افتح عيوني واغمض..في حلم ولا علم.. انا اكيد برا السعودية.. مش معقول ابدا اللي بيحصل ده.. واخذتني الذمة وقلت له يالحبيب تراني ما ادري الجهاز يمكن جاه شيء وانا بعيد عنه اخاف سبحان الله يصير بالذمة شيء..

‎بعد ما طقطق بكمبيوتره: الجهاز هذا مشترى من امريكا وما هو مسجل عند الوكيل في السعودية وعلشان كذا لازم تدفع مية ريال حسب نظام الشركة..

‎انا: بسيطة ..بس مية..ما طلبت شيء..وطلعت المية وانا والله خايف انه يهون.

‎دخل سوي وطلع معه جهاز ايبود جديد بكرتونه وفتح الكرتون قدامي وطلع الرقم وسجله عنده واخذ بياناتي وسلمني الجهاز مع ابتسامه واعتذر انه اخذ مني  المية ريال، والمفاجأة الأكبر انه اعطاني ضمان ١٠ شهور قدام على الجهاز الجديد..

‎هذي تجربتي حبيت اطرحها لكم واعتذر عن الإطالة لكن حبيت اذكر تجربتي بكل تفاصيلها علشان يعرف حبايبنا في السعودية مع مين يتعاملون واذا يبون يشترون يتأكدوا من الضمان عند مين وهذا اهم شي.
‎وسلامتكم..

المبيعات 22‏/4‏/2011 تم النشر بواسطة ابوياسر٢.
الإجابات
1 من 4
تكفى يا غالي والحمد لله انو اتبدل
انا اجاني ايفون 4 هدية
طلعت السماعة الداخلية خربانة
ودلوني ع مقر شركة اي كير ( بعد عذااااااااااااااااااب طويل من مراجعة مكان الشراء الى شركة اس تي سي وبالعكس )
والحين ابحث في النت وما عم اعرف وين مكان الشركة
واسأل صحابي ما احد يعرفها
اعرف انو في طريق العروبة بس وين ...
ممكن لو سمحت الموقع بالتفصيل الله لايهينك
9‏/9‏/2011 تم النشر بواسطة بدون اسم.
2 من 4
موقع آي كير في طريق العروبة
اذا دخلت الشارع من طريق الملك عبدالعزيز تجيك اشارة وبعدها تحصل المحل على يسارك 
12‏/9‏/2011 تم النشر بواسطة بدون اسم.
3 من 4
ممكن رقم.الشركة للي يعرفه
23‏/5‏/2012 تم النشر بواسطة بدون اسم.
4 من 4
2153186
24‏/5‏/2012 تم النشر بواسطة بدون اسم.
قد يهمك أيضًا
لماذا جهاز آي فون المباع اكسترا ضمان STC؟
كيف تعرف مكان صناعة جهاز آي فون 4
ماهو الايفون
أيهما أفضل n8 الصيني أو الفنلندي
عيوب الجهاز الكومبيوتر الصيني
تسجيل الدخول
عرض إجابات Google في:: Mobile | كلاسيكي
©2014 Google - سياسة الخصوصية - مساعدة